ਨੇੜਲੇ ਤਾਂ ਜਾਣ ਲੈਂਦੇ, ਦੂਰਲੇ ਅਣਜਾਣ ਹੁੰਦੇ ।
ਫ਼ਾਸਲੇ ਤੋਂ ਇਹ ਬੁਰੇ ਲੋਕੀ ਨਹੀਂ ਪਹਿਚਾਣ ਹੁੰਦੇ ।
ਡੁੱਬਦਿਆਂ ਨੂੰ ਕੱਢਣੇ ਦਾ, ਬਹੁਤ ਕਰਦੇ ਜੋ ਦਿਖਾਵਾ,
ਡੋਬਣੇ ਦਾ ਹੀ ਅਸਲ ਵਿੱਚ ਲਾ ਰਹੇ ਉਹ ਦਾ ਤਾਣ ਹੁੰਦੇ ।
ਪਿੱਠ ਉੱਤੇ ਜ਼ਖਮ ਲੈ ਕੇ, ਛੱਡਦੇ ਨੇ ਰਣ ਭਗੌੜੇ,
ਯੋਧਿਆਂ ਦੇ ਐਨ ਸੀਨੇ ਵਿੱਚ ਲੱਗਦੇ ਬਾਣ ਹੁੰਦੇ ।
ਦੋਸਤੀ ਦਾ ਦਮ ਵੀ ਭਰਦੇ, ਆਖਦੇ ਉਹ ਆਪਣਾ ਵੀ,
ਪਿੱਠ ਪਿੱਛੇ ਫੇਰ ਮੇਰੀ ਕਰ ਰਹੇ ਪੁਣ-ਛਾਣ ਹੁੰਦੇ ।
ਤੋੜ ਕੇ ਵਾਅਦਾ ਉਹ ਅਪਣਾ ਖਾਹ-ਮਖਾਹ ਇਤਰਾ ਰਹੇ ਨੇ,
ਬਹੁਤ ਦੇਖੇ ਨੇ ਅਸੀਂ ਵੀ ਵਾਅਦਿਆਂ ਦੇ ਘਾਣ ਹੁੰਦੇ ।
No comments:
Post a Comment